Condiciones xenerales de contratación de suministru eléctricu consumidores
1. OXETU DEL CONTRATU
L’oxetu d’esti contratu (“Contratu de Suministru”) ye’l suministru d’electricidá pela parte de Masnorte Global Power, S.L. (“el Comercializador”) a les instalaciones del Cliente nel puntu de conexón (“Puntu de suministru”) conseñáu nes Condiciones Particulares d’esti Contratu.
Cola robla d’esti Contratu de Suministru, y nun siendo que’l Cliente nun manifieste espresamente’l so propósitu de contratar l’accesu a la rede de distribución (“Contratu d’Accesu”) directamente cola Empresa Distribuidora de la zona onde s’alluga la instalación del Cliente (“Empresa Distribuidora”), el Cliente acepta espresamente la contratación conxunta de l’adquisición de la enerxía y l’accesu a la rede al traviés del Comercializador. Arriendes d’ello, autorízalu espresamente pa que, nel so nome, suscriba o modifique’l contratu d’Accesu cola Empresa Distribuidora y puea cambiar la tarifa d’accesu, asumiendo los costes y la posición xurídica nel mentáu contratu d’accesu. El Cliente manifiesta que s’alcuentra al corriente de pagu pa col suministru d’electricidá oxetu d’esti contratu y oblígase a nun rescindir el mentáu Contratu d’Accesu que’l Comercializador formalice cola Empresa Distribuidora, mientres tea vixente esti Contratu de Suministru.
Esti Contratu de Suministru ye de calter personal, manifestando’l Cliente ser l’usuariu efectivu de la enerxía, nun pudiendo utilizalo en sitiu distintu a lo que foi contratao, nin cedelo, nin vendelo a terceros.
2. PUNTU DE SUMINISTRU Y CONDICIONES TÉCNIQUES
A los efectos d’esti Contratu, entiéndese por Puntu de Suministru’l puntu de conexón o entrega allugáu na instalación del Cliente, nel que se fai la midida del consumu de la enerxía eléctrico suministrao pol Comercializador.
La tensión nominal y les potencies contrataes coles que se fai’l suministru son les que figuren nes Condiciones Particulares, de conformidá colo dispuesto pola normativa vixente y, en particular, conforme al Real Decretu 1164/2001, de 26 d’ochobre.
El cliente aportará la referencia catastral arreyada al emplazamientu onde s’ubique tou puntu de suministru contratáu.
3. DURACIÓN DEL CONTRATU, ENTRADA EN VIGOR Y ANICIU DEL SUMINISTRU
La duración d’esti Contratu ye d’un añu, a contar a partir de la fecha d’aniciu del suministru, pudiendo prorrogase de forma automática por periodos de la mesma duración, a nun ser que cualquiera de les partes comunique la so voluntá de despachalu con una antelación mínima de sesenta (60) díes naturales a la fecha de vencimientu o de cualquiera de les prórrogues, al traviés de cualquier mediu que permita tener constancia de la identidá y de la voluntá del interesáu.
Si’l contratu tuviera una duración determinada, en definiendo y roblando nes referencies contractuales la fecha d’aniciu y de fin d’esti, nun sedrá procedente l’aplicación del párrafu anterior referente a la prórroga añal automática, sinón que se despachará darréu na fecha de finalización que defina’l contratu. Si en llegando la fecha de fin de contratu les partes quixeran prorrogar la rellación contractual, habrán roblar un contratu nuevu.
El Contratu entrará en vigor nel momentu de roblalu, anque la so efectividá queda condicionada al otorgamientu per parte de la Empresa Distribuidora del accesu a la rede de distribución.
4. EQUIPOS DE MIDIDA Y CONTROL YA INSTALACIONES
El Cliente habrá disponer nel Puntu de Suministru, durante la vixencia d’esti Contratu de Suministru, d’un equipu de midida y control de la enerxía eléctrico suministrao (“Equipu de Midida y Control”) que cumpla los requisitos técnicos llegalmente establecíos na normativa vixente d’aplicación y, particularmente, nel Real Decretu 1110/2007, de 24 d’agostu, y na normativa que lo modifique o sustituya.
L’Equipu de Midida y Control va poder ser propiedá del Cliente o ser arrendáu a la Empresa Distribuidora. En casu d’arriendu, el preciu que se va facturar por esti conceptu va ser aplicáu pola Empresa Distribuidora como propietaria de los equipos, según el preciu que venga establecíu pola normativa vixente.
El Cliente ye’l responsable de les instalaciones y de la custodia de los equipos que miden el consumu, y del cumplimiento de les demás obligaciones establecíes pola llexislación vixente. En particular, el Cliente oblígase a nun manipular nengún de los componentes de la instalación, y n’especial l’Equipu de Midida y Control, según lo dispuesto na normativa vixente. En casu de manipulación, el Comercializador quedará exoneráu de cualquier eventualidá que pudiera derivar del incumplimientu d’esta obligación, ensin perxuiciu de les responsabilidaes que llegalmente foran exixibles al Cliente pola mentada manipulación, y ensin perxuiciu de les refacturaciones que procedan d’acuerdu cola normativa establecida al efectu.
El Cliente, de conformidá cola normativa vixente, habrá garantizar l’accesu físicu a les instalaciones de midida, n’horas hábiles o de normal funcionamientu col esterior, a la Empresa Distribuidora, o a los empleaos o contratistes d’estos, de manera que puean facer los trabayos d’instalación, llectura, inspección, comprobación, verificación, mantenimientu, precintáu o otros que con calter xeneral resulten necesarios pa una prestación eficaz del serviciu oxetu d’esti Contratu de Suministru. El Cliente oblígase a dotar a les sos instalaciones interiores o receptores de mecanismos de protección contra sobreintensidaes o sobretensiones, de conformidá colo establecío nel Art. 16.3 del Reglamentu Electrotécnicu de Baxa Tensión vixente, y según les prescripciones definíes nes instrucciones técniques ITC-BT-022 e ITC- BT-023 del mentáu Reglamentu.
5. PRECIU DEL CONTRATU
El preciu del suministru sedrá l’establecíu nel Anexu rellativu a les Condiciones Particulares, qu’inclúi l’importe correspondiente al preciu de la enerxía suministrao, d’acuerdu colos precios Anexos a esti Contratu, el preciu del peaxe d’accesu y demás componentes regulaos pola normativa aplicable que correspuende percibir a la Empresa Distribuidora. Los precios nun incluyen los tributos, o recargos vixentes en cada momentu que graven el suministru y/o les actividaes necesaries pa la operación del suministru eléctricu, que sedrán exixibles al Cliente.
Amás d’ello, sedrán al cargu del Cliente toos aquellos gastos, costes o recargos que resulten llegalmente exixibles como consecuencia de la suscripción del Contratu de Suministru y del Contratu d’Accesu.
Cualquier variación nos precios nos peaxes d’accesu, o otros componentes regulaos que correspuenda percibir a la Empresa Distribuidora, sedrá trasladada de manera automática a los Precios del contratu, ensin que constituya modificación de les Condiciones económiques del mesmu. Nesi casu, la variación de precios sedrá comunicada al Cliente na facturación siguiente a la so aplicación, quedando ésti facultáu pa resolver el Contratu, habiendo comunicase tal circunstancia al Comercializador nun plazu máximu de 10 díes.
En casu d’errores alministrativos o de funcionamientu incorrectu del Equipu de Midida y Control, o en casu de manipulación de les instalaciones o fraude na midida del consumu, el Cliente habrá abonar l’importe correspondiente a les refacturaciones que por estos conceptos puean xirase, de conformidá colo establecío na normativa vixente.
6. LLECTURA, FACTURACIÓN Y PAGU
La periodicidá de la facturación sedrá la indicada nes Condiciones Particulares. La facturación de los consumos d’electricidá efectuaos fadráse d’acuerdu coles midíes de consumu real apurríes pola Empresa Distribuidora, na periodicidá y conforme a lo dispuesto na normativa d’aplicación, en concreto, pa los consumidores en Baxa Tensión hasta 15 qW de potencia contratao, el Real Decretu 1718/2012, de 28 d’avientu.
De toles maneres, en casu de que nun se puea acceder al Equipu de Midida pa facer la llectura, y el Cliente nun ponga a disposición de la Empresa Distribuidora la llectura del so equipu, el Cliente faculta espresamente al Comercializador a facturar según les llectures estimaes que-y apurra la Empresa Distribuidora, en función del procedimientu recoyíu na normativa vixente en cada momentu. Too ello, ensin perxuiciu de la regularización añal que se faiga en base a llectures reales y, en casu de que nun seya apurrida a la Empresa Distribuidora per parte del Cliente, en base a estimaciones.
El Comercializador emitirá la factura y detallará’l preciu y l’importe correspondiente a la enerxía consumío y la potencia contratao, con imputación de la parte correspondiente de los peaxes, el preciu del alquiler de los equipos de midida y control, y el preciu d’otros conceptos aplicables, amás de los impuestos, recargos, tases y/o tributos aplicables. La factura tamién detallará los descuentos y/o refacturaciones complementaries que, nel so casu, resulten d’aplicación, amás d’otros costes que l’Alministración puea aprobar na vixencia del Contratu de Suministru. La facturación d’enerxía reactivo, cuando proceda, fadráse d’acordies a lo establecío nes Condiciones Particulares, conforme se determina na llexislación vixente.
El pagu fadráse según la manera y plazu establecíos nes Condiciones Particulares. La fecha na que se tien que facer el pagu de los recibos domiciliaos ye aquella en que la entidá bancaria na que se fixo la domiciliación reciba la comunicación col importe que tien qu’abonar el Cliente.
A los clientes con recibu domiciliáu, nel casu de qu’exista una devolución bancaria, cobraráse-yos un 3% del importe total, con mínimu de 20 euros en factura por GASTOS DE DEVOLUCIÓN. De la mesma manera, a los clientes que nun tienen el recibu domiciliáu cobraráse-yos 20 euros de GASTOS DE XESTIÓN cuando paguen la factura fuera de plazu.
7. MONEDERO MASNORTE
El serviciu Monederu Virtual Masnorte (MVM) consiste nel rexistru y acumulación de la enerxía escedentario xenerao pola instalación d’autoconsumu nun monederu virtual accesible de manera qu’est se convierta nun saldu económicu que, al tiempu, podrá ser aplicáu como un descuentu nes factures del suministru eléctricu contratáu pol cliente.
El serviciu nomáu «Monedero Virtual Masnorte» (d’equí pa en delantre, «MVM») ta empobináu esclusivamente a aquellos clientes que tengan –o vayan tener– una instalación d’autoconsumu y tean o vayan tar na modalidá de suministru con autoconsumu con escedentes acoyida a compensación, d’acordies colo establecío nel Real Decretu 244/2019, de 5 d’abril. Amás d’ello, el cliente habrá tar dau d’alta nesti serviciu al traviés de contratación privada con Masnorte Global Power pa xestionar el MVM.
El saldu arreyáu a la enerxía escedentario acumularáse mensualmente, ensin llende máxima nin fecha de caducidá y podrá ser convertío en descuentos en cualquier momentu demientres el serviciu tea activáu. El descuentu podrá ser aplicáu a otros puntos de suministru diferentes al que tea arreyáu a la instalación d’autoconsumu, siempre que’l titular del puntu de suministru seya’l mesmu en toos ellos, y s’alcuentre al corriente de les obligaciones de pagu. En nengún casu l’aplicación de los descuentos podrá suponer la emisión de factures negatives pela parte de Masnorte Global Power, S.L. o l’abonu directu de cantidaes a favor del cliente.
El preciu horariu venceyáu a la enerxía horario escedentario del mecanismu de compensación simplificada a efectos del Real Decretu 244/2019, de 5 d’abril, sedrá’l que s’establez nes condiciones particulares del contratu. Amás d’ello, l’importe al que se convertirá esa enerxía en saldu económicu nel MVM.
Opcionalmente, el productu pue tener asociáu otru contratu secundariu ensin autoconsumu que s’aprovechará del descuentu na factura de la compensación. Cómo máximo, podrán asociase dos contratos a un MVM (contratu principal con autoconsumu + contratu secundariu ensin autoconsumu) y los dos contratos asociaos a un MVM virtual habrán tener el mesmu titular y el mesmu pagador. El saldu disponible usaráse pa compensar l’importe de les facturas mentaes per orde cronolóxicu d’emisión. El cliente nun podrá escoyer sobre qué factures o productos s’utiliza’l saldu del MVM, nin podrá utilizalu pa pagar otros bienes. En casu de cambéu del pagador del contratu principal piérdese’l saldu sobrante que puea quedar depués de la factura postrera. En casu de que’l pagador arreyáu al MVM tuviera delda viva de dalguna factura anterior nun se fadrá’l descuentu venceyáu al mesmu hasta la siguiente factura emitida ensin qu’exista delda per parte del pagador. En nengún casu se podrá aplicar un descuentu por batería virtual mayor que’l máximu de compensación permitíu poles regles de compensación d’autoconsumos (inclusive pal contratu secundariu). El MVM namás pue tener valores negativos cuando se realicen factures rectificadores / abonos sobre una factura qu’introduxera un saldu positivu nel MVM.
El coste del serviciu indicaráse nes condiciones particulares conteníes en caún de los contratos d’autoconsumu por compensación nos que se diere d’alta’l serviciu MVM. Masnorte Global Power S.L. facturará al cliente una cuota diaria pola prestación d’esti Serviciu nes factures d’electricidá del suministru nes que se contratare’l Serviciu. El preciu de la cuota actualizaráse col IPC real (últimu índiz de Precios al Consumu interañal xeneral espublizáu oficialmente nel momentu de l’actualización) l’ún de xineru de cada añu.
El serviciu MVM tendrá duración añal, prorrogándose de manera automática per periodos iguales, nun siendo que notifiquen lo contrario cualquiera de les partes con un preavisu mínimu de sesenta (60) díes ensin penalización dala. La baxa aplicaráse dende la fecha del últimu consumu d’electricidá facturáu al cliente nel puntu de suministru que contratare’l Serviciu. A partir d’esa fecha, los escedentes non compensaos nun s’acumularán y tampoco se facturará al cliente nenguna cuota pol Serviciu.
Masnorte Global Power, S.L. acuta’l derechu a modificar o revocar en cualquier momentu les presentes condiciones, qu’han ser comunicaes con, a lo menos, un mes d’antelación, teniendo derechu’l cliente a resolver el contratu del serviciu ensin coste dalu.
Amás d’ello, Masnorte Global Power, S.L. dará de baxa’l serviciu MVM en casu de que’l cliente (i) dexe de tar acoyíu a la modalidá d’autoconsumu con escedentes acoyida a compensación (ii) si da de baxa nel contratu de suministru eléctricu arreyáu al serviciu MVM y/o (iii) si contrata un productu incompatible col serviciu MVM.
N’escenarios talos, el saldu del que disponga’l cliente nesi momentu podrá ser usáu hasta qu’escose. En casu de que’l cliente diere de baxa tolos suministros eléctricos contrataos con Masnorte Global Power, S.L. perdería’l saldu acumuláu na batería virtual ensin que seya canxeable por dineru.
8. CALIDÁ DEL SUMINISTRU Y DESCUENTOS EN CASU D’INCUMPLIMIENTU
El suministru fadráse nes condiciones de continuidá y calidá previstes nel Real Decretu 1955/2000, d’ún d’avientu (Arts. 101 a 103) o normativa que lu sustituya.
L’incumplimientu per parte de la Empresa Distribuidora de los niveles de calidá individual traerá darréu descuentos y/o bonificaciones, siendo repercutíos al Cliente, en siendo aplicaos pola Empresa Distribuidora, nos plazos reglamentariamente previstos.
9. MODIFICACIÓN DE LES CONDICIONES DEL CONTRATU
Les condiciones contractuales d’esti Contratu podrán ser modificaes pol Comercializador en siendo comunicao al Cliente, con una antelación de 30 díes naturales a la fecha efectiva de la modificación, ensin perxuiciu de la facultá del Cliente de resolver el Contratu por disconformidá y ensin penalización dala.
En casu de nun manifestar lo contrario, entenderáse que’l cliente acepta les modificaciones na fecha determinada.
De toles maneres, en casu de que se trate d’una modificación de les Condiciones contractuales como consecuencia directa de la normativa aplicable o de la decisión vinculante d’órganos alministrativos o xudiciales, la comunicación al Cliente fadráse nel momentu de l’aplicación, pudiendo igualmente’l Cliente resolver el Contratu ensin nenguna penalización, d’acordies colo establecío nel apartáu anterior.
10. DERECHOS D’ACOMETIDA Y DEPÓSITU DE GARANTÍA
Los trabayos que traigan darréu d’ellos pagos por derechos d’accesu, estensión, enganche o supervisión d’instalaciones cedíes, igual que los rellativos a la verificación o reconexón d’instalaciones que correspuenda percibir a la Empresa distribuidora, sedrán al cargu del Cliente nos términos y condiciones previstos reglamentariamente.
Si a la suscripción del Contratu d’Accesu a la rede de distribución, la Empresa distribuidora solicita l’establecimientu d’un depósitu de garantía, d’acordies colo establecío nel Art. 79.7 del RD 1955/2000, esti sedrá repercutíu al Cliente. La vuelta d’esti depósitu de garantía fadráse nel momentu de la resolución del Contratu, ensin perxuiciu de la facultá de la Empresa Distribuidora d’aplicar la parte correspondiente d’esti depósitu al saldu de les cantidaes pendientes de pagu nel momentu de la resolución contractual, d’acordies colo establecío nel Real Decretu 1955/2000, o normativa que lu sustituya.
11. SUSPENSIÓN DEL SUMINISTRU Y RESOLUCION DEL CONTRATU
En casu d’impagu per parte del Cliente d’una factura vencida, el Comercializador podrá tramitar la suspensión del suministru, si trescurríos venti díes naturales dende la presentación del cobru a la entidá financiera onde’l Cliente tenga domiciliáu’l pagu de la factura, o, nel casu de factures non domiciliaes, trescurrida la fecha límite de pagu indicada na mesma, esta nun fore satisfecha íntegramente. Nesi sen, el Comercializador requerirá al Cliente pa que, nel plazu de diez díes dende la comunicación, proceda a facer efectivu’l pagu de la delda vencida, amás de los intereses xeneraos. Estos importes sedrán cuantificaos y comunicaos al Cliente primero. N’acabando’l plazu concedíu al Cliente pa facer efectivu’l pagu ensin que’l mesmu se fixere efectivu, el Comercializador podrá solicitar a la Empresa Distribuidora que proceda a suspender el suministru eléctricu, comunicándose al Cliente la fecha prevista pa la suspensión del suministru, con una antelación mínima de cinco díes.
L’exerciciu pol Comercializador del derechu a suspender el suministru nun quita al Cliente de la obligación de pagar l’importe de la facturación pendiente, conforme a lo establecío nel Contratu.
En casu de que’l Comercializador opte por suspender el suministru y el Cliente satisfaga la totalidá de la delda correspondiente, incluyíos los correspondientes a la reposición del suministru, el Comercializador mandará’l restablecimientu del suministru al siguiente día a aquel en que se fixere’l el pagu.
Amás d’ello, el suministru podrá ser suspendíu:
- En casu de fuerza mayor y casu fortuitu.
- En casu de fraude o manipulación, o d’instalaciones peligroses que supongan riesgu pa la seguranza de persones o bienes.
- En xeneral, nos supuestos previstos na normativa eléctrica vixente y, especialmente, por incumplimientu de les obligaciones establecíes nesti Contratu.
Son causes de resolución del Contratu, con independencia de les conseñaes na llexislación vixente, les siguientes:
- La finalización del plazu de vixencia del Contratu o, nel so casu, de cualquiera de les prórrogues.
- L’incumplimientu, por cualquiera de les partes, de cualquier obligación derivada del Contratu, n’especial la falta de pagu de cualquiera de les factures per parte del Cliente.
- L’exerciciu per parte del Cliente del derechu de resolver el Contratu, como consecuencia de les modificaciones contractuales per parte del Comercializador.
En casu de rescisión unillateral del Contratu per parte del Cliente primero de la fecha de finalización d’esti (primer añu), que nun venga motivada por una modificación contractual per parte del Comercializador, podrá comportar una penalización económica consistente nel 5% del preciu de la enerxía estimao pendiente de suministru.ores.
12. FUERZA MAYOR Y CASU FORTUITU
Nun responderán nin el Cliente nin el Comercializador de los eventuales incumplimientos d’esti Contratu de Suministru en casos de fuerza mayor y casu fortuitu. Considérense causa de fuerza mayor los fechos imprevisibles o que, previstos, seyan inevitables ya irresistibles, ayenos a les partes, dende’l momentu en que los mesmos imposibiliten el cumplimientu de les obligaciones d’esti Contratu de Suministru. En particular, nun responderá’l Comercializador si existe una imposibilidá per parte del Comercializador d’adquirir o facer llegar la enerxía eléctrico al Cliente, por causes non imputables a él, o por intervención directa o indirecta de terceros.
13. CESIÓN Y SUBROGACIÓN DEL CONTRATU
El Cliente, siempre que tea al corriente de pagu, podrá trespasar el so contratu a otru consumidor que vaya a usalo nel mesmu allugamientu y pal mesmu usu, subrogándose l’usuariu nuevu nes mesmes condiciones. Amás d’ello, habrá acreitase la conformidá del cliente nuevu y apurrir los datos personales, CIF o NIF/NIE y los datos de cuenta bancaria.
El Cliente autoriza al Comercializador a ceder el presente Contratu y los derechos y obligaciones derivaes del mesmu a cualquier sociedad participada, arreyada o socesora que puea ufrir nun futuru’l serviciu oxetu d’esti Contratu, siendo abonda a tal efectu la comunicación afayadiza al Cliente.
14. DESISTIMIENTU
En casu de que’l Contratu se celebrare a distancia (per teléfonu o per Internet), d’acordies col Real Decretu Llexislativu 1/2007, de 16 de payares, el Cliente podrá desistir d’esti Contratu nel periodu de catorce díes naturales siguientes a su celebración, ensin necesidá de xustificar la decisión y ensin penalización dala.
Pa exercer el derechu de desistimientu, el Cliente habrá notificar a la Comercializadora de forma inequívoca, a les señes conseñaes más p’abaxo, la decisión de desistir del Contratu. El Cliente pue solicitar el modelu de formulariu de desistimientu a la Comercializadora.
En casu d’exercer el derechu de desistimientu, volveránse al Cliente los pagos fechos, como mui tarde, catorce díes naturales a partir de la fecha na que s’informe de la decisión de desistir del Contratu. En nengún casu’l Cliente incurrirá en gastu dalu como consecuencia del reembolsu.
En casu de que’l Cliente previamente solicitare que’l suministru d’enerxía eléctrico entamare nel periodu de desistimientu, el Cliente tará obligáu a abonar un importe proporcional a la parte yá disfrutada del serviciu nel momentu que comunique’l desistimientu, en rellación col oxetu total del Contratu.
15. SERVICIU D’ATENCIÓN AL CLIENTE Y VÍES DE SOLUCIÓN DE CONFLICTOS
Pa cuestiones venceyaes a esti Contratu, o pa cualquier incidencia o reclamación en rellación col serviciu contratáu, el Cliente pue empobinase al Serviciu d’Atención del Cliente del Comercializador, de manera presencial en C/ Rafael Alberti, 8, 33243 Posada (Llanera), Asturies, llamando al númberu de teléfonu de baldre 900 90 70 54, o pue empobinase a la dirección de corréu electrónico contacto@masnorte.es
En casu de que’l Cliente presente una reclamación, de nun resolvese nel plazu d’un (1) mes o si, resuelta, nun fora estimada, el Cliente podrá presentar reclamación énte l’organismu competente, a los efectos de la tramitación de los servicios de mediación y sistema arbitral de consumu que seyan d’aplicación, pa los supuestos nos que’l Comercializador se sume.
Pal supuestu de que la controversia nun se someta a nenguna entidá de resolución alternativa de pleitos en materia de consumu, o qu’estes nun resulten competentes pa la resolución del conflictu, el Cliente que seya persona física podrá someter la controversia al Ministeriu d’Industria, Enerxía y Turismu, cuando controversies tales se refieran a los sos derechos específicos como usuarios finales. Nesti casu, el procedimientu aplicable sedrá aprobáu per Orde del Ministeriu d’Industria, Enerxía y Turismu, ensin que puean ser oxetu del mesmu les controversies que tean regulaes por normativa distinta de la de protección específica de los usuarios finales d’enerxía eléctrico.
16. LLEXISLACIÓN Y XURISDICCIÓN
Esti Contratu de Suministru tará rexíu y sedrá interpretáu d’acordies cola llei española aplicable y, en particular, cola Llei 24/2013, de 26 d’avientu, del Sector Eléctricu, el Real Decretu 1955/2000, d’ún d’avientu y, nel so casu, normativa que la sustituya, y conforme a la so normativa de desendolcu.
Nel casu de que se produza cualquier discrepancia o controversia a cuenta de la interpretación, aplicación o execución d’esti Contratu, el Comercializador y el Cliente, sométense a la xurisdicción de los Xulgaos y Tribunales correspondientes a los tribunales d’Uviéu.
17. PROTECCIÓN DE DATOS DE CALTER PERSONAL
¿Quién ye’l responsable del tratamientu de los tos datos? Mansorte Global Power, S.L. Tienes tola información de contactu, amás de la ubicación de les nuestres oficines na nuestra web masnorte.es
¿Pa qué atropamos y usamos los tos datos? Necesitámoslos pa perfeccionar el contratu de suministru d’enerxía eléctrico del que faes parte. Quier dicise, ensin los tos datos nun podemos suministrate enerxía, nin facturate, nin iguar incidencies técniques. L’incumplimientu de la obligación de pagu podría suponer la inclusión de los tos datos en sistemes d’incumplimientu d’obligaciones dineraries.
Conservamos los datos mientres seyas cliente nuestru. Si dexes de selo, bloquiámoslos per cuatro años; en trescurríu esi plazu, eliminámoslos.
Llexitimación: artículu 6.1.b. El tratamientu de datos ye necesariu pa la execución d’un contratu nel que l’interesáu ye parte. Tu yes parte d’un contratu de suministru eléctricu.
Cesiones: Podremos ceder l’usu d’estos datos y/o dar accesu a los mesmos, nel casu de que’l cliente solicite la contratación de dalgún serviciu pa que Masnorte Global Power S.L. tenga que subcontratar a cualquier otra empresa, y namás nesos casos. Amás de los obligaos pal cumplimientu d’obligaciones llegales nel so casu.
¿Qué pues facer respecto a los tos datos? Pues solicitar l’exerciciu de los derechos que tienes respecto a los tos datos (accesu, rectificación, cancelación, oposición, limitación, supresión); namás únvianos la solicitú xunta la copia del DNI o documentación identificativa en vigor, a l’atención del Delegáu de Protección de Datos o la mesma documentación a . Tamién pues escribir al nuestru Delegáu si tienes duldes de cuálos son los tos derechos, cómo exercelos, o si, a cencielles, necesites daqué rellacionao colos tos datos.
