La llingua de casa tamién forma parte de la nuestra manera d’entender la enerxía
Pa Masnorte ye un orgullo recibir del Principáu d’Asturies, al traviés de la Conseyería de Cultura, Política Llingüística y Deporte, el distintivu Alfaya, marca asturiana d’usu llingüísticu, nel so Nivel 3 d’Excelencia.
Ye un reconocimientu especialmente importante pa nós porque va muncho más allá d’un distintivu. Reconoz una manera d’entender la nuestra actividá y confirma un compromisu que forma parte de Masnorte: facer que l’asturianu tenga presencia real y natural tamién nel día a día d’una empresa.
Falamos d’un serviciu tan cotidianu, esencial y universal como la enerxía. De contratar la lluz, recibir una comunicación, consultar información na web o abrir cada mes una factura. Y creemos que l’asturianu tamién tien que poder tar presente nesi espaciu: na llingua de casa.
Normalizar ye usar
La normalización d’una llingua nun se consigue namás falando d’ella. Consíguese usándola.
Por eso, en Masnorte llevamos tiempu incorporando l’asturianu con naturalidá a la nuestra actividá: nes comunicaciones, na publicidá, na web, nos materiales corporativos y nes distintes formes de relación colos nuestros clientes.
Queremos que recibir una factura, consultar una información o conocer una nueva propuesta de Masnorte pueda facese tamién n’asturianu, ensin que tenga que ser algo excepcional. Porque una llingua vive precisamente cuando forma parte de les coses normales de cada día.
Esa ye tamién la filosofía d’Alfaya: reconocer a les empreses que dan presencia efectiva a les llingües propies d’Asturies nel ámbitu económico y empresarial. Y algamar el Nivel 3 d’Excelencia, el máximu nivel del distintivu, anímanos a siguir avanzando nesi camín.
Un reconocimientu y, sobre manera, una responsabilidá
Recibir esti distintivu nun ye pa nós un puntu final. Ye xustamente lo contrario.
Ye un estímulu pa continuar trabayando, pa siguir incorporando l’asturianu a nuevos espacios y pa collaborar con instituciones, empreses y colectivos que comparten l’oxetivu de facer de la nuestra llingua una ferramienta útil, viva y presente na sociedá asturiana.
El Nivel 3 d’Excelencia reconoz tamién el papel de les empreses como referentes y embaxadores llingüísticos. Asumimos esa reconocencia con ilusión, pero tamién cola responsabilidá de demostrar que empresa, innovación, competitividá y compromisu cola cultura propia pueden caminar xuntos.
Porque mirar al futuru nun significa dexar atrás lo que somos.
En Masnorte queremos siguir creciendo, innovando y llevando una enerxía más cercana a cada vez más hogares y empreses, cola mirada puesta nel futuru y ensin perder nunca de vista d’ónde venimos.
Vamos siguir trabayando xuntos, avanzando y faciendo que l’asturianu ocupe con absoluta normalidá l’espaciu que-y correspuende tamién nel mundu empresarial.
Porque la enerxía forma parte de la nuestra vida cotidiana. La nuestra llingua, tamién.
Y porque prestar un serviciu esencial na nuestra llingua tamién ye una forma de cuidala.
